Самсунг Сөүл эмнэлгийн өрхийн анагаах ухааны профессор Шин Дон Ук, Сүншиль их сургуулийн статистикийн тэнхимийн профессор Хан Гён До, АНУ-ын Пенсильванийн их сургуулийн судлаач Жон Вон Ён нарын судалгааны баг нь хөхний хорт хавдартай өвчтөнүүдийн хавдар оношлогдохоос өмнөх ба дараах жингийн өөрчлөлт зүрх судасны өвчин болон зүрхний дутагдлын эрсдэлд хэрхэн нөлөөлдөг талаар судалгаа хийж, үр дүнгээ олон улсын эрдэм шинжилгээний сэтгүүл болон Америкийн эмч нарын холбооны хавдрын сэтгүүлийн сүүлийн дугаарт нийтэлжээ.
Судалгааны дүгнэлтээр хөхний хорт хавдартай өвчтөнүүд зүрхний эрүүл мэндээ хамгаалахын тулд тогтмол жингээ хянах шаардлагатайг онцолсон байна. Учир нь эдгээр өвчтөнүүд тамоксифен зэрэг дааврын эсрэг эмчилгээ хийлгэх, биеийн идэвхи буурах зэрэг шалтгаанаар олонхи нь жин нэмдэг. Судалгаагаар жин 10%-иар нэмэгдэхэд зүрх судасны өвчин үүсэх эрсдэл 66%, зүрхний дутагдал үүсэх эрсдэл 85%-иар нэмэгддэг бол, жин буурахад дээрх эрсдэлүүд мөн буурдаг болохыг тогтоожээ.
Энэ нөлөө нь ялангуяа 50-аас доош насны залуу өвчтөнүүдэд илүү хүчтэй илэрч байсан байна. Судалгааны багийнхан “Хөхний хорт хавдар нь ихэвчлэн 40–50 насанд илэрдэг. Энэ үед хавдрын эсрэг болон дааврын эмчилгээ хийлгэж байхдаа цэвэршилтийн өөрчлөлтүүд давхар явагддаг тул жин нэмэх нь түгээмэл. Иймд хооллолтоо хянаж, дунд түвшнээс дээш биеийн хөдөлгөөн хийх замаар тохиромжтой жингээ хадгалах нь зүрх судасны өвчнөөс сэргийлэхэд чухал ач холбогдолтой” хэмээн зөвлөсөн байна.
- Facebook
- Instagram
Хөхний хорт хавдартай өвчтөнүүд, жингээ хянаснаар зүрхээ хамгаална
Холбоотой нийтлэлүүд
